Mer informasjon
Naustdal kommune er ei jordbruksbygd. Vi er om lag 2700 personar i kommunen, der rundt halvparten bur i og omkring sentrum. Største arbeidsgjevaren er Naustdal kommune. Arealet er ca. 370 km2 , og naturen spenner frå kyst-/fjordlandskap i vest, til høgfjell i nordaust. Naustdal sentrum ligg om lag midt i lengdeaksen av kommunen, og herfrå går dalføret i lett stigning inntil det endar opp i høgaste bunktet Blåfjellet, på 1390 m.o.h.
Naustdal ligg sentralt plassert berre 11 km frå fylkessenteret Førde, og utgjer eit naturleg midtpunkt på den sentrale aksen mellom Førde og Florø. Kommunen strekkjer seg frå bygdene i dalen til Vevring og Kvellestad ut i fjorden. Les mer...
Naturen er svært fin, og lett tilgjengeleg for dei fleste både sommar og vinter. Elva som renn gjennom dalføret, Nausta, er ei veldig god elv for laksefiske med stang. I tillegg innbyr fjella til turar både med og utan fiskestang.
Få idrettslag har fostra så mange idrettsfolk på nasjonalt toppnivå som “Tambarskjelvar” i Naustdal: Hekkeløparen Håkon Fimland saman med Stian Grimseth og andre vektløftarar har vore grossistar i nasjonale meisterskapstitlar, og volleyballjentene har sanka gull og ære. Dei særmerkte kunstnarane Kjartan Slettemark og Oddvar Torsheim har vakse opp i Naustdal, og i Vevring skipar bygdefolket årleg til ei kunstmønstring som vekkjer nasjonal merksemd.
Vi har levande bygder med engasjerte menneske som vil det beste for heimstaden sin. Dei bidreg til det gode liv med ei dugnadsånd utan sidestykke gjennom eit mangfald av frivillige lag og organisasjonar.
